Assalamu’alaikum wr. wb.
Bapak-bapak, Ibu-ibu warga negari Indonesia ingkang kinurmatan. Ing saben tanggal 10 Nopember bangsa Indonesia tansah mengeti dinten ageng inggih punika dinten Pahlawan. Kados sampun kacetha bilih rikala tanggal 10 Nopember 1945, ing kutha Surabaya wonten prastawa perang ageng antawisipun arek-arek Surabaya ngusir penjajah ingkang mbonceng Inggris (Sekutu) lumarap ing tanah Jawi. Saking semangat arek-arek Surabaya lan kalajengaken pejuang rakyat ing daerah sanesipun, ing salajengipun damel horeging donya, ngantos Dewan Keamanan PBB tumut campur tangan ngengingi prastawa punika. Perjuangan kala wau kinanthen semboyan “Rawe-rawe rantas malang-malang putung”, “Mandheg ambleg, mundur ajur”, lan “Mati siji tuwuh sewu”. Bapak-bapak, Ibu-ibu warga bangsa Indonesia. Ing pengetan punika mboten kula jlentrehaken sadaya prastawa ing tanggal 10 Nopember 1945, nanging semangatipun ingkang kapendhet hikmahipun. Semangat perjuangan pahlawan kangge nindakaken berjuang ing babagan pembangunan. Kanthi rahmating Allah SWT Pahlawan Indonesia sampun saged ngrebat wilayah Surabaya. Kula mboten saged nglalekaken mekaten kemawon perjuanganipun arek Surabaya ingkang dipunpimpin dening panjenenganipun pejuang ageng, inggih puniika semangat Bung Tomo, ingkang kanthi sora ngagungaken asmaning pangeran: “Allahu Akbar! Allahu Akbar!”. Jiwa lan semangat 10 Nopember taksih wonten ing jajaning bangsa Indonesia kangge mbangun negari Indonesia kanthi unen-unen “Sepi ing pamrih rame ing gawe”. Kathah para pejuang ingkang ndhepani bantala mbela bangsa lan negari kangge putra lan putu ing tembe. Pramila, mangga sesarengan nglajengaken punapa ingkang dados perjuanganipun para pahlawan. Ing salebeting kita merdika kita taksih berjuang, mboten kangge merangi penjajah nanging kangge merangi ‘kemiskinan’ lan ‘kebodhohan’ tumraping Bangsa Indonesia. Pramila mboten wonten awonipun, kangge ngenget jasa pahlawan, sumangga ngeningaken cipta sakedhap kangge para pahlawan ingkang sampun gugur ing medhan juang. Mugi-mugi amal lan kesaenanipun katampi ing sisihing Gusti. Kula cekapi semanten rumiyin atur kula, bilih wonten kiranging atur mawantu-wantu nyuwun pangaksama. Mugi-mugi bangsa Indonesia pinaringan sihing Pangeran.
Wassalamu’alaikum wr. wb. Nuwun.